Құрметті білім алушылар, оқытушылар, әріптестер мен серіктестер!
Жаңа оқу жылы — әрдайым жаңа мүмкіндіктерге, биік мақсаттарға жол ашатын маңызды кезең. Біз 2025–2026 оқу жылын үлкен үмітпен, зор жауапкершілікпен және нақты жетістіктермен қарсы алып отырмыз.
Shakarim University өткен оқу жылында елеулі жетістіктерге қол жеткізді:
Тұңғыш рет QS World University Rankings жаһандық рейтингіне ендік,THE Impact Rankings пен QS Stars жүйесіндегі нәтижелерімізді жақсарттық, халықаралық жобаларды сәтті жүзеге асырдық, ғылымның трансұлттық тізбегіне ендік.
Бұл қадамдар — мемлекетіміздің алға қойған міндеттері мен Президент тапсырмаларына жауап ретінде жасалған мақсатты әрекеттер.
Мемлекет басшысы Қасым-Жомарт Кемелұлы Тоқаев: «Білім мен ғылым Қазақстан дамуының қозғаушы күші болуға тиіс» деген болатын. Олай болса, өңірлік университеттер осы жаңа даму моделінің тірегіне айналуы тиіс.
Неге өңірлік университеттер?
Өйткені біз өз туған өлкесін дамытуға ұмтылған жастармен жұмыс істейміз.
Біз — экономиканың, демографияның, еңбек нарығының сұраныстарына алғашқылардың бірі болып жауап береміз.
Президент атап өткен елді дамытатын мамандар осындай ортада қалыптасады.
Shakarim University – бұл ұлттық тұрақтылықтың бір бөлігі, ел дамуына тікелей ықпал ететін зияткерлік орта.
Біз жаңа оқу жылын мынадай маңызды нәтижелермен қарсы алып отырмыз:
Соңғы екі жылда толық жаңғыртылған инфрақұрылым: зертханалар, жатақханалар, коворкинг кеңістіктері, инженерлік хабтар;
Халықаралық серіктестіктер: Xi’an Jiaotong University, NWAFU, HSK орталығы, WSG University және т. б. мекемелермен;
Ғылым мен технология тоғысынан туған өз өнімдерімізбен: Innovation hub, Shakarim lab, Агротехнопарк, Инженерлік орталық.
Жас оқытушылар мен ғалымдардан жасақталған командамен: басшылықтың орташа жасы 39, science-профессорлар үлесі 39% құрайды.
Басқару жүйесіндегі цифрлық трансформациямен. Біздің алдағы бағытымыз қандай болмақ?
Shakarim University-ді ғылым мен адами капиталдың өңірлік хабына айналдыру.
QS рейтингінің ТОП-1000 қатарына ену.
Жасанды интеллект пен аралас оқытуды білім берудің жаңа нормасына айналдыру.
Өндіріс, агроөнеркәсіп және IT салаларының нақты сұраныстарына жауап беру.
Мемлекеттік міндеттерді жүзеге асыруда интеллектуалдық серіктес болу.
Құрметті 1-курс білім алушылары!
Сіздер үнемі жаңарып, күн сайын дамып келе жатқан университеттің студенті атандыңыздар.
Сіздер бұйрық күтіп отырмай, күн тәртібін өзі қалыптастыратын команданың бір бөлігісіздер.
Сіздер үшін барлық есік ашық — білім, технология, зерттеу, серіктестік мүмкіндіктері. Соларды барынша пайдаланыңыздар! Әрбір қадамыңыз жарқын болашаққа бастар жол болсын!
Құрметті ата-аналар!
Бізге артқан сенімдеріңіз үшін алғысымыз шексіз.
Сіздердің таңдауларыңыз – соңғы екі жылда жүзеге асқан серпінді реформаларға берілген жоғары баға. Бұл сенім – біз үшін үлкен жауапкершілік, және біз күн сайын осы сенімді ақтауға барымызды саламыз.
Осы ретте Абай облысы әкімдігіне және облыс әкімі Берік Уәлиге айрықша алғысымызды білдіреміз. Білім мен ғылымды дамыту жолындағы қолдау — біз үшін стратегиялық серіктестік қана емес, өңірлік әлеуетті арттырудың басты тірегі. Бірлесе жұмыс істеудің арқасында біз университеттің абыройын арттырып, жастар үшін жаңа мүмкіндіктер көкжиегін ашып келеміз.
Құрметті әріптестер, студенттер!
Бүгінде университет қатардағы оқу орны шеңберінен шығып, өңір мен елдің дамуына ықпал ететін зияткерлік орталық болып отырғандықтан, біздің инерциямен жұмыс істеуге құқығымыз жоқ.
Әр кафедра, әрбір жоба, әр шешім ел мүддесіне: өңірдің дамуына, мемлекеттің беделін арттыруға және алға қойған ұлттық міндеттерді орындауға бағытталуы тиіс.
Shakarim University – қазіргі таңда ұлттық сенім инфрақұрылымының маңызды бөлшегіне, өңір мен жаһанды байланыстыратын зияткерлік көпірге айналды. Сондықтан біз жылдам әрекет етуге, елдік деңгейде ойлауға және халықаралық маңызға ие нәтижелерге қол жеткізуге міндеттіміз.
Жаңа оқу жылы құтты болсын!
Бұл жыл әрқайсымыз үшін және бүкіл еліміз үшін жауапкершілік, шешім және серпіліс жылы болғай!
Құрметпен, Думан Орынбеков
