Құрметті студенттер, әріптестер!
Биыл Қазақстан Республикасы Конституциясының қабылданғанына 30 жыл толып отыр. Бұл — біздің мемлекетіміздің нышанына айналған, әрбір азаматтың құқықтары мен бостандықтарының кепілі болған және елдің тұрақты дамуының берік негізін қалаған басты Заң.
1995 жылы жалпыұлттық референдумда қабылданған Конституция Қазақстан тәуелсіз мемлекет ретінде өз жолын жаңа бастаған тарихи сәтте дүниеге келді. Ол еркін, қуатты және әділетті қоғам туралы арманды әр азаматқа қорған болған нақты құқықтық нормалармен біріктірді.
Конституция жастарға не береді? Ең алдымен — армандауға және әрекет етуге мүмкіндік береді. Білім алу құқығын, яғни кәсіби жол мен үлкен өмірге бастар есікті ашады. Ой мен сөз бостандығы арқылы өз өміріңді еркін, қорқынышсыз құруға жағдай жасайды. Еңбекке, ғылымға, шығармашылық пен кәсіпкерлікке араласа отырып, ел дамуына үлес қосуға жол ашады. Ең бастысы — баршаға ортақ заң мен әділдікке сенім, құқықтарыңның қорғалатынына деген берік үміт сыйлайды.
Нельсон Мандела айтқандай: «Білім — дүниені өзгерте алатын ең қуатты қару». Конституция — білімнің қолжетімділігін қамтамасыз ететін, дамуға, оқуға және өз дауысыңды естіртуге мүмкіндік беретін заң.
Елімізде құқық үстемдігін нығайтуда Конституциялық Соттың қайта жаңғыруының маңызы ерекше. Президент Қасым-Жомарт Тоқаевтың бастамасымен қалпына келтірілген бұл институт — басты Заңның сақталуының қосымша кепілі, азаматтардың құқықтарын қорғаудың тетігі және мемлекеттік институттарға деген сенімді нығайтудың маңызды құралы. Жас ұрпақ үшін бұл — олардың құқықтары мен бостандықтарының ең жоғарғы құқықтық қорғауда екеніне деген сенім.
Қазір халықаралық аренада біз Қазақстанда әлем мойындаған демократия және құқық үстемдігі қағидаттарына сәйкес келетін Заң бар екенін мақтанышпен айта аламыз. Біздің міндетіміз — оны білу ғана емес, сонымен қатар, оның мазмұнын адал еңбегімізбен, шынайылығымызбен және жасампаздыққа ұмтылысымызбен толтыру.
Конституцияның 30 жылдығы — тек бір құжаттың мерейтойы емес, бұл — біздің ортақ жауапкершілігіміздің мерекесі. Конституцияның күші оның мәтінінде ғана емес, сонымен қатар, біз, азаматтар, оны күн сайын қалай жүзеге асыратынымызда.
Конституция күні құтты болсын, қадірлі достар!
Ол әрдайым біз үшін сенімділіктің, бостандықтың және мүмкіндіктің қайнары болсын. Қазақстандағы әрбір жас өз дауысын – маңызды, еңбегін -қажет, болашағын қорғалған сезінсін.
Ректор Думан Орынбеков
